Son 10 oyunda qələbə üzünə həsrət qalan "Sumqayıt" futbol klubunun rəhbərliyi artıq futbolçulara öz sərt üzünü göstərib.
Sportinfo.az-ın məlumatına görə, uğursuzluq seriyasının uzanmasına adekvat olaraq iki qərar verilib. "Gənclik şəhəri" təmsilçisi Premyer Liqada mövsümün sonunadək bir daha mükafat almayacaq.
Həmçinin komanda oyunlardan öncə təlim-məşq toplanışı keçməyəcək. "Kimyaçılar" yalnız matç günü yığışacaq və meydana ayaq basacaq.
Qeyd edək ki, komanda ölkə kubokunda mübarizəni erkən - 1/4 final mərhələsində dayandırıb. Çempionatda da vəziyyət ürəkaçan deyil: klub 24 turdan sonra turnir cədvəlində yeddinci pilləyə enib. Aktivində 32 xalı olan "Sumqayıt" de-fakto medalçılar sırasına düşmək şansını itirib. Avrokuboklara vəsiqə ehtimalı da praktiki cəhətdən 0-a enib.
