Xəbər verdiyimiz kimi, 26 yaşlı sumqayıtlı kikboksçu, muay-tay döyüşçüsü Ruslan Nağıyev Kambocada International Professional Combat Council (İPCC) tərəfindən təşkil olunan titul döyüşündə yerli çempion, kxmer boksu üzrə superulduz sayılan Thoeun Thearanı ilk raundda nokauta salaraq Dünya birinciliyinin kəmərini əldə edib.
Bu münasibətlə Sumqayit24.az sumqayıtlı çempionla həmsöhbət olub. Müsahibəni təqdim edirik.
- Kambocada "Kun Khmer" çempionuna qarşı döyüşə çıxmaq və onu ilk raundda nokauta salmaq necə bir hissdir?
- Hazırda Rajadamnern World Series (RWS) təşkilatı üzrə dünyada muay-tay üzrə 1-ci pillədəyəm. Mən bu kəmər uğrunda döyüş təklifini səbrsizliklə gözləyirdim və nəhayət təklif gəldi. Çoxdan arzuladığım təkliflə düşünmədən razılaşdım və döyüşə böyük məsuliyyətlə yanaşdım.
- Rinqə çıxanda yerli publikanın rəqibi tam dəstəklədiyini hiss edirdiniz. Bu atmosfer sizə necə təsir etdi?
- Kambocada yerli idmançılara xalqın dəstəyi böyükdür. Bu dəstək istər mənəvi, istərsə də maddi cəhətdən göstərilir.
Təbii ki, qərarı hakimlərə saxlamağın yanlış olacağını bilirdim. Çünki bu halda qələbəni yerli idmançıya verəcəkdilər. Bu səbəbdən mən tək rəqibimə yox, hakimlərə də qalib gəlməliydim.
- Nokaut anında tarix yazdığınızı dərhal başa düşdünüz, yoxsa, bu hiss yalnız döyüş bitəndən sonra gəldi?
- Bəli, aydın olaraq başa düşürdüm. Əvvəlcədən, hələ döyüşə hazırlaşarkən hər şeyi düşünmüşdüm, qarşıma məqsəd qoyub rinqə çıxmışdım.
- Bu qələbə karyeranızda hansı mərhələni ifadə edir və sizi bundan sonra hansı döyüşlər gözləyir?
- Mən bu qələbə ilə kifayətlənmirəm. Böyük planlarım var. Hər döyüşdən sonra dərhal idman zalına qayıdıram, məşqlərə başlayır, özümü inkişaf etdirməyə çalışıram.
Arzum təkcə bir nömrə yox, həm də əfsanə olmaqdır.
- Sizi izləyən, döyüşlərinizdən ilhamlanan azərbaycanlı, sumqayıtlı gənclərə nə məsləhət verərdiniz?
- Gənc həmyerlilərimə heç vaxt ruhdan düşməməyi, Allaha və öz gücünə inanmalarını məsləhər görürəm. Elə vaxt gələcək ki, səni bəyənməyənlər, pisləyən şəxslər səninlə görüşməyi arzu edəcəklər.
