Mehdi Hüseynzadə adına Sumqayıt şəhər stadionunun qazonunda müəyyən problemlər yaranıb.
Bu barədə Sumqayit24.az-a "Sumqayıt" Futbol Klubunun mətbuat katibi Zaur Xudiyev məlumat verib.
Zaur Xudiyevin sözlərinə görə, stadionun qazonunda yaranan problemin vəziyyəti hələ dəqiq müəyyənləşməyib. Bu səbəbdən oyunların stadionda keçirilib-keçirilməyəcəyi ilə bağlı yekun qərar verilməyib.
"Avqustun 7-də "Sumqayıt" Futbol Klubu Qəbələdə son yoxlama oyununu keçirəcək, daha sonra isə Sumqayıta qayıdacaq. Avqustun 8-də stadionda yerində baxış keçiriləcək və vəziyyət qiymətləndirildikdən sonra oyunun keçirilib-keçirilməyəcəyi ilə bağlı qərar veriləcək.
Əgər oyunun Mehdi Hüseynzadə adına Sumqayıt şəhər stadionunda keçirilməsi mümkün olmasa, SOCAR Polymer Arena və ya "Neftçi"nin "Palms Sports Arena"sı nəzərdən keçiriləcək. Hazırda isə bununla bağlı dəqiq qərar yoxdur", - deyə Zaur Xudiyev bildirib.
