Ötən ilin noyabrında "Neftçi" futbol klubundan uzaqlaşdırılan Samir Abasov "Sumqayıt"la danışıqlara başlayıb.
Sportinfo.az-ın məlumatına görə, o, mövsüm qurtaran kimi doğma şəhərin komandasına dönmək fikrindədir. Tərəflər arasında görüşmələr hələlik ilkin mərhələdədir.
Əvvəllər müxtəlif vaxtlarda üç dəfə "kimyaçılar"ı çalışdırmış Abasovin növbəti qayıdışı realdır.
Çünki klubun rəhbərliyində təmsil olunanlar içində onun təyinatına müsbət yanaşanlar çoxdur. 2024-cü ilin oktyabrında buradan ayrılmış mütəxəssisin onlarla əlaqəsi ötən müddətdə heç kəsilməyib.
Ötən ilin iyulunda "Sumqayıt"ın sükanı arxasına keçən Saşa İliçin burada fəaliyyətini davam etdirib-etdirməməsi qazanacağı nəticələrdən asılıdır.
Klub rəhbərliyi artıq ona müvafiq xəbərdarlığını edib.
Serbiyalı mütəxəssis komandanı avrokuboklara daşımalıdır ki, onunla yeni müqavilə imzalansın. Premyer Liqada 22 tura 31 xal toplamış komanda hazırda turnir cədvəlinin altıncı pilləsindədir.
"Sumqayıt" ötən ilin iyulunda balkanlı çalışdırıcı ilə 1 illik müqavilə imzalayıb. Qarşıya qoyulan hədəfə çatmaq mümkün olmasa, o, iyunda geri dönməmək şərtiylə ölkəsinə qayıtmaq məcburiyyətində qalacaq.
