Sumqayıtlı cüdoçular Məktəblilərin Respublika İdman Olimpiadasının qalibi olublar.
Abşeron Olimpiya Kompleksində təşkil olunan yarışda qızıl medal qazanan yeniyetmələr həyəcanlı anlarını "Azərbaycan müəllimi" ilə bölüşüblər.
"Şagirdlərə tövsiyə edərdim ki, həm dərslərini oxusunlar, həm də idmanla məşğul olsunlar"
Nərmin Məmmədli Sumqayıt şəhərində fəaliyyət göstərən Qubadlı rayon UGİŞM-in yetirməsidir və 40 kq çəki dərəcəsində yarışaraq qızıl medala layiq görülüb. Nərmin Sumqayıt şəhər Ş.İ.Xətai adına 30 nömrəli tam orta məktəbin şagirdidir, 13 yaşından cüdo ilə məşğul olur:
"Həm çox həyəcanlı, həm də çox sevincliyəm. Birinci yerə çıxacağımı gözləyirdim, çünki çox yaxşı hazırlaşmışdım. Məşqçim Vüsal İbrahimova dərin təşəkkür edirəm, qələbəmdə böyük zəhməti var. Olimpiada mənə sevincli anlar, yeni dostlar bəxş etdi. Şagirdlərə tövsiyə edərdim ki, həm dərslərini oxusunlar, həm də idmanla məşğul olsunlar".
"Bu mənim ilk qızıl medalımdır və hədsiz qürurluyam"
Əkbər Qədirli Sumqayıt şəhəri İOEUGİM-in yetirməsidir və 50 kq çəki dərəcəsində yarışaraq olimpiadanın qalibi olub. O, Sumqayıt şəhər 8 nömrəli tam orta məktəbin 10-cu sinfinə keçib, cüdo ilə 7 ildir ki, məşğul olur:
"Keçən il cüdo üzrə Respublika çempionatında üçüncü yerin qalibi olmuşam, Türkiyədə keçirilən Avropa kubokunda bürünc medal qazanmışam. Bu, mənim ilk qızıl medalımdır və hədsiz qürurluyam. Arzum gələcəkdə dünya çempionu olmaq, bayrağımızı ucaltmaqdır".
