Sosial şəbəkələrdə yayılan məlumatlar futbolsevərlərin diqqətini cəlb edib. İddialara görə, Seneqal millisinin heyətində Afrika Millətlər Kubokunun qalibi İdrissa Qeye karyerasını Azərbaycan Premyer Liqasında, daha dəqiq desək, "Sumqayıt" klubunda davam etdirə bilər.
Məsələnin nə dərəcədə doğru olduğunu öyrənmək üçün Sumqayit24.az "Sumqayıt" FK-nın mətbuat katibi Zaur Xudiyevlə əlaqə saxlayıb.
Klub rəsmisi yayılan xəbərləri təsdiqləməyib:
"Hazırda klubda transfer istiqamətində işlər gedir. Konkret siyahı və adlarla bağlı dəqiq məlumatım yoxdur. Amma bildiyim qədər, adı çəkilən futbolçu ümumiyyətlə siyahıda olmayıb. İstənilən halda, azarkeşlərdən klubun yalnız rəsmi açıqlamalarına etimad etmələrini xahiş edirik".
Qeyd edək ki, 36 yaşlı İdrissa Qeye karyerası ərzində PSJ, Lille, Aston Villa və Everton kimi Avropanın tanınmış klublarında çıxış edib. Təcrübəli dayaq yarımmüdafiəçisi hazırda azad agent statusundadır.
