"Neftçi" ilə matçdan sonra şüşə qapını sındıraraq ayağından xəsarət alan "Sumqayıt"ın kapitanı Səbuhi Abdullazadənin hazırkı vəziyyəti məlum olub.
"Sumqayıt" FK-nın mətbuat katibi Zaur Xudiyev Sumqayit24.az-a açıqlamasında bildirib ki, 24 yaşlı futbolçu hazırda Bakıda özəl xəstəxanadadır və yaxın saatlarda əməliyyat olunacaq.
Onun sözlərinə görə, Abdullazadənin yarasına tikiş qoyulacaq. Futbolçunun sağalma və bərpa müddəti isə əməliyyatdan sonra dəqiq müəyyənləşəcək.
"Klubun həkimi dünən gecədən Səbuhinin yanındadır. Onun verdiyi məlumata görə, Səbuhinin karyerasına təsir edəcək bir vəziyyət yoxdur. Vəziyyət kifayət qədər ciddidir, amma əməliyyatdan sonra karyerasını davam etdirə biləcək", – deyə Zaur Xudiyev bildirib.
Mətbuat katibi əlavə edib ki, futbolçunun vəziyyəti ilə bağlı daha ətraflı məlumat əməliyyatdan sonra açıqlanacaq.
