"Sabah meydanda çox diqqətli olmalıyıq".
Sumqayit24.az xəbər verir ki, bunu UEFA Çempionlar Liqasının əsas mərhələsinin yeddinci turunun "Qarabağ" - "Ayntraxt Frankfurt" matçından əvvəl keçirilən mətbuat konfransında Ağdam klubunun baş məşqçisi Qurban Qurbanov deyib.
O bildirib ki, rəqibin baş məşqçi dəyişikliyi planlarını poza bilər:
"Yanvardan bu vaxtadək üç matç keçiriblər. Həm fərqli heyət, həm fərqli sistemdə meydana çıxırdılar. Oyunun gedişində müxtəlif hücumlar qururdular, hər oyunda fərqli müdafiə olunurdular. Buna uyğun təhlillər etsək də, rəqibin baş məşqçi dəyişikliyi planlarımızı dəyişdi. Sabah meydanda çox diqqətli olmalıyıq. Əsas öz oyunumuzu intizamlı oynasaq, diqqətli olsaq, rəqibin nə etmək istədiyini bilsək, problemlə üzləşməyəcəyik. Rəqib təcrübəli komandadır".
"Nadir hallarda belə havalarda matçlar təxirə salınır. İnanıram ki, hava oyuna ciddi təsir etməyəcək", - deyə baş məşqçi hava haqqında da danışıb.
Qeyd edək ki, yanvarın 21-də Tofiq Bəhramov adına Respublika stadionunda keçiriləcək qarşılaşma saat 21:45-də start götürəcək.
