Sumqayıtlı karateçi Rafael Ağayev son müsahibəsində həyat və idman karyerası ilə bağlı səmimi fikirlərini bölüşüb.
5 qat dünya, 11 qat Avropa çempionu və Olimpiya Oyunlarının gümüş mükafatçısı olan idmançı bildirib ki, karate ona həyatda çox şey öyrədib:
"Karate mənə kimlərisə verdi, kimlərisə aldı. Həyatda mənim üçün ən vacib məsələ çempion olmaq yox, kişi oğlu kimi yaşamaq və bu dünyadan kişi kimi köçməkdir".
Tanınmış karateçi qeyd edib ki, əldə olunan uğurları qorumaq mümkün olsa da, insan olaraq qalmaq daha çətin məsələdir:
"Çempion olmaq da olar, çempionluğu qoruyub saxlamaq da. Amma həyatda insan olmaq daha çətindir və hər kəsə qismət olmur".
Rafael Ağayev insanlar tərəfindən ilk baxışdan yanlış qiymətləndirildiyini də etiraf edib. Onun sözlərinə görə, bəzi şəxslər onu tanımadan özündənrazı hesab edirlər:
"Bəzən məni tanımayanlar xarici görünüşümə görə özündənrazı biri olduğumu düşünürlər. Amma söhbət etdikdən sonra fikirləri dəyişir. Mən də bəzən insanlar haqqında ilk təəssürata əsasən yanlış düşünürəm və onları tanıdıqdan sonra həmin fikrimə görə utanıram".
Mənbə: Sport1.аz
