İsrailli futbolçu Roi Kehat artıq üçüncü mövsümdür ki, Sumqayıt klubunun formasını geyinir və 2025-ci ildə müqaviləsini daha iki il uzadıb. O, İdman.Biz-ə müsahibəsində həm komandanın inkişafından, həm də Azərbaycandakı həyatından danışıb.
Kehat bildirib ki, komanda bu illər ərzində tamamilə dəyişib: ilk mövsümdə oyun üslubu daha çox mərkəzə söykənirdi, indi isə cinahlardan daha fəal istifadə olunur. Onun sözlərinə görə, heyət bu mövsüm daha balanslıdır və komanda "top-3" və ya "top-4" uğrunda mübarizə apara bilər. Təcrübəli futbolçu qeyd edib ki, çempionatda lider olan "Sabah" bunu təsadüfən etməyib, amma sonda "Qarabağ"ın təcrübəsi həlledici ola bilər.
Roi Kehat ailəsi ilə birlikdə Bakıda yaşayır. Üç övladı var və kiçik qızı Azərbaycanda dünyaya gəlib. Oğlu artıq Azərbaycan dilində sərbəst danışır və bəzən atası üçün tərcüməçilik də edir. Futbolçu Azərbaycanın həyat keyfiyyətini yüksək qiymətləndirir, insanların qonaqpərvərliyini xüsusi vurğulayır.
Milli mətbəximizdən isə ən çox düşbərəni və xüsusilə ət qutabını sevdiyini deyib. Ailəsi ilə birlikdə həm Azərbaycan bayramlarını, məsələn Novruzu, həm də İsrail ənənələrini qeyd etdiklərini bildirib. Bakıda yəhudi icması ilə sıx əlaqədə olduqlarını da əlavə edib.
Kehat 2007-ci ildən həyat yoldaşı ilə birlikdədir – məktəb illərindən tanışdırlar. O deyir ki, həyat yoldaşının xoşbəxt olması onun futbol karyerasında uğurunun əsas səbəblərindən biridir. Bakıda həyat yoldaşı pilates təlimatçısı kimi çalışır və ailə özünü burada rahat hiss edir.
