Bir neçə gün əvvəl Samir Abasovun Şərqi Avropa ölkələrindən birinin yüksək liqa təmsilçisindən təklif aldığı barədə məlumat yayılıb. Bildirilirdi ki, tərəflər arasında ilkin danışıqlar aparılıb və 48 yaşlı sumqayıtlı mütəxəssis qərar vermək üçün qarşı tərəfdən vaxt istəyib.
Yayılan son məlumata görə, Abasov bu təklifi qəbul etməyib. Buna səbəb klub rəhbərliyi ilə əməkdaşlıq şərtləri üzrə fikir ayrılığının yaranması olub.
İddialara əsasən, adı açıqlanmayan klub transfer siyasətinin yalnız rəhbərliyin istəklərinə uyğun həyata keçiriləcəyini bildirib. Bu isə Samir Abasovu qane etmədiyindən tərəflər arasında razılıq əldə olunmayıb.
Məlumatda qeyd olunur ki, gələcəkdə xaricdə çalışmaq istəyən mütəxəssisin agentləri hazırda digər variantlar üzərində işləyirlər.
Qeyd edək ki, Samir Abasov "Neftçi"ni sonuncu dəfə Azərbaycan çempionluğuna daşıyan baş məşqçi olub. O, həmçinin "Sumqayıt"ı UEFA Konfrans Liqasına çıxarmaqla klub tarixinin ən uğurlu nəticələrindən birinə imza atıb.
Mənbə: Sport24.az
