Misli Premyer Liqasında bu mövsüm ümumilikdə 272 futbolçu meydana çıxıb ki, onlardan 28-i üç və ya daha az oyunda iştirak edib.
Futbolinfo.az-ın məlumatına görə, "Sumqayıt" klubu digərlərindən fərqlənir. "Kimyaçılar"ın baş məşqçisi 4 nəfərə ən yaxşı halda üç oyun şans verib.
Qeyd edək ki, ümumi liqada baş məşqçilər cari mövsüm 7 oyunçuya cəmi bir matçda şans veriblər. "Qəbələ"dən Qədir Ramazanov və "İmişli"dən Hüseynəli Quliyev ən şanssız futbolçulardır. Çünki hər ikisi bir görüşün əlavə edilmiş dəqiqəsində mübarizəyə qoşulub və cəmi 1 dəqiqə meydanda olub.
Futbolçularına ən çox güvənən komanda kimi "Neftçi"ni qeyd etmək olar. Çünki yalnız "ağ-qaralar"da üç və ya daha az oyun keçirən yoxdur. "Kəpəz" və "Araz-Naxçıvan"da cəmi 1 belə oyunçu var. "Karvan-Yevlax", "Qəbələ", "Qarabağ", "Turan Tovuz", "Şamaxı" və "Sabah"da bu say 3, "Zirə" ilə "İmişli"də isə 2-yə bərabərdir.
