"Sumqayıt" futbol klubunun düşərgəsində xaosun yarandığı iddia olunur.
Futbolinfo.az-ın yaydığı xəbərə görə, baş məşqçi Saşa İliçlə oyunçular arasında ciddi problemlər yaranıb. Serb mütəxəssis Səbuhi Abdullazadədən narazıdır və mətbuat konfransında bunu açıq şəkildə dilə gətirib. Yalnız kapitan onunla problemi olan yeganə futbolçu deyil. Digərləri də İliçlə müxtəlif insidentlər yaşayıb.
Ən böyük problemin Danilo Beskorovaynıyla bağlı olduğu bildirilir. İddiaya əsasən, ukraynalı müdafiəçi ilə münasibətlər hətta dava-dalaş həddinə çatıb. "Sabah"la oyundan sonrakı məşqlərdən birində legioner oyunçu çalışdırıcı ilə əlbəyaxa olub. Qarşılıqlı ittihamlardan sonra tərəflər sakitləşdirilib. Bunun nəticəsidir ki, Beskorovaynıy son turun "Neftçi" ilə oyununda meydana buraxılmayıb. O, sonadək oyunu ehtiyat oyunçular skamyasından izləyib.
Bildirilib ki, yayda İliç komandada qalarsa, ukraynalı ilə yollar ayrılacaq, amma böyük ehtmal məhz serb məşqçi yola salınacaq.
"Sumqayıt" futbol klubunun mətbuat katibi Zaur Xudiyev isə yayılan xəbəri təkzib edib. Onun sözlərinə görə, baş məşqçi ilə futbolçu arasında nəinki əlbəyaxa dava, heç bir narazılıq yoxdur və ola da bilməz:
"Danilo Beskorovaynının oynamamağı taktiki qərardır. Baş məşqçi həmin oyunda başqa müdafiəçilərlərlə oynamağı üstün tutub. Yəni burada hər hansı narazılıqdan söhbət gedə bilməz.
Azarkeşlərimizdən xahiş edirəm ki, "Sumqayıt" FK haqqında çıxan bəzi yalan xəbərlərə fikir verməsinlər və klubun mövqeyini əsas götürsünlər".
