"Əlbəttə, komandanın son oyunlardakı nəticələri bizi çox narahat edir".
Bu sözləri Sportinfo.az-a açıqlamasında "Sumqayıt" futbol klubunun prezidenti Riad Rəfiyev deyib.
Saşa İliçin çalışdırdığı kollektiv ölkə kubokunda mübarizəni erkən dayandırıb. Çempionatda da vəziyyət ürəkaçan deyil. Komanda 24 turdan sonra turnir cədvəlində yeddinci pilləyə enib. Aktivində 32 xalı olan "Sumqayıt" de-fakto medalçılar sırasına düşmək şansını itirib.
"Gənclik şəhəri" təmsilçisinin rəhbəri mövcud vəziyyəti bu cür dəyərləndirib:
"Təəssüf ki, "qara zolağ"a düşmüşük və cəhdlərimizə rəğmən, hələlik buradan çıxa bilmirik. Lakin əlimizi-qolumuzu yanımıza salıb dayanmaq fikrimiz yoxdur.
Bütün komanda olaraq çalışırıq ki, uğursuzluğa son verək. Əminəm ki, bir qələbə ilə hər şey dəyişəcək və momentum yenidən bizim xeyrimizə dönəcək.
Bu baxımdan komandamıza, baş məşqçimizə güvənimiz tamdır. Ona inanırıq və bizi bu çətin vəziyyətdən çıxaracağına inanırıq".
