"Sumqayıt" futbol klubunun prezidenti Riad Rəfiyev ölkə ərazisini tərk edib.
Sportinfo.az-ın məlumatına görə, 2018-ci ilin əvvəlindən "kimyaçılar"ın rəhbəri olan şəxs Braziliyaya yollanıb. Onun səfəri bir məqsəd daşıyır - yerli klubların funksionerləri ilə görüşərək qarşılıqlı əməkdaşlığın təməlini atmaq.
"Gənclik şəhəri" təmsilçisi Braziliyanın futbol bazarı ilə yaxın münasibətlər qurmağı planlaşdırır. Bu ölkə Riad Rəfiyevə yad yer deyil. O, 24-25 il öncə futbola ilk addımlarını məhz Braziliyada atıb.
Belə ki, Rəfiyev məşhur "Santos" akademiyasına qəbul edilib, aşağı yaş qrupları üzrə komandaların formasını geyinib. Cənubi Amerikadan qayıdandan sonra isə "Karvan"la müqavilə bağlayıb.
Keçmiş müdafiəçi ayağından aldığı ağır zədə üzündən 20 il əvvəl karyerasını elə Yevlax təmsilçisində başa vurmalı olub.
