"Sumqayıt" futbol klubunda maliyyə çatıhmazlığı yaranıb.
Bu barədə Sportinfo.az-a "kimyaçılar"ın bir neçə futbolçusu məlumat verib. Onların sözlərinə görə, artıq iki aydır ödəmələr gecikir, maaşlarını tam şəkildə almırlar.
Həmçinin mükafatların verilməsi də problemə çevrilib. Dörd oyunun "ənam"ını gözləyə-gözləyə qalıblar.
Klub rəhbərliyi futbolçuların sualına cavab olaraq vəd verib ki, mövcud çətinlik müvəqqətidir, UEFA-dan gələcək pulu gözləyirlər. Həmin məbləğ büdcəyə köçürülən gün bütün borclar bağlanacaq.
Futbolçulara inansaq, komandanın son vaxtlar qeyri-sabit çıxış etməsi sırf bu amillə əlaqədardır. Onlar maliyyə öhdəlikləri vaxtında yerinə yetirilmədiyindən, toparlana, bütün diqqətlərini oyunlara yönəldə bilmirlər.
"Sumqayıt" Premyer Liqanın arxada qalan 21 həftəsində 31 xal toplayıb. "Gənclik şəhəri" təmsilçisi bu göstərici ilə turnir cədvəlinin altınca pilləsində yerləşib.
Sumqayit24.az-ın əməkdaşı məsələ ilə bağlı "Sumqayıt" FK-nın mətbuat katibi Zaur Xudiyevə sorğu ünvanlayıb. Sorğuya cavab olaraq bildirilib ki, yayılan məlumatlar həqiqəti əks etdirmir:
"Klubda hansısa maliyyə problemi yoxdur. Ödənişlər uyğun qrafiklə, zamanında edilir".
