"Sumqayıt" futbol klubunda maliyyə çatışmazılığının olduğu bildirilir.
Sportinfo.az-ın yaydığı məlumata görə, Premyer Liqada mövsümü yeddinci pillədə başa vuran "gənclik şəhəri" təmsilçisi 3 aya yaxındır əməkhaqqı üzünə həsrətdir.
Redaksiyaya "kimyaçılar"ın düşərgəsindən bildirilib ki, idarəçilər bu mövzuda onlara edilən müraciətə birmənalı cavab verməyib. Ödəmələrin nə vaxt həyata keçiriləcəyini demirlər.
"Düzələcək, bir az gözləyin" - cavab yalnız bundan ibarətdir.
Komanda üzvlərinin sözlərinə inansaq, yeni ildən sonra qeydə alınan uğursuz nəticələrin əsas səbəbi budur. Məvaciblər gecikdirildiyindən, futbolçularda ruh düşkünlüyü yaranıb.
Üstəlik, martdan sonra mükafat fondu "dondurulub". Rəhbərlik avrokuboklara vəsiqə şansının itməsini əsas gətirərək, belə bir qərar qəbul edib.
Məlumatın doğru olub-olmadığını öyrənmək üçün Sumqayit24.az "Sumqayıt" FK-ya sorğu göndərib. Komandanın mətbuat katibi Zaur Xudiyev açıqlamasında xəbəri təkzib edib:
"Yanlış informasiyadır. Hazırda gecikən əməkhaqqı ödəməmiz yoxdur".
