Sumqayıtlı deflimpiyaçı cüdoçusu Coşqun Əliyev İsveçrənin Lozanna şəhərində eşitmə qabiliyyəti məhdud olan idmançılar arasında ilk dəfə keçirilən "Ecole Mont-Olivet Deaf Judo Masters Top 18" turnirində qızıl medal qazanıb.
Sumqayit24.az xəbər verir ki, -60 kq çəki dərəcəsində mübarizə aparan idmançımız dairəvi sistem üzrə keçirilən yarışda üç görüş keçirib. Yarışa inamlı start verən Coşqun Əliyev ilk görüşündə 2025-ci il Deflimpiya çempionu, braziliyalı Dantes Pedro ilə qarşılaşıb. Təmsilçimiz rəqibini 2:1 hesabı ilə məğlub edib.
İkinci görüşdə qazaxıstanlı Aktynberk Kakitayevə 0:1 hesabı ilə uduzsa da, cüdoçumuz son qarşılaşmada türkiyəli Nurullah Dündarı ipponla məğlub edərək turnirin qalibi olub.
Beləliklə, Coşqun Əliyev güclü rəqiblərin yer aldığı mötəbər yarışda qızıl medal qazanaraq "Masters Top 18" turnirinin ilk azərbaycanlı qalibi kimi tarixə düşüb.
Qeyd edək ki, ötən il Coşqun Əliyev XXV Yay Deflimpiya Oyunlarında gümüş medal əldə edərək ölkəmizə bu yarışlarda ilk medalını qazandıran idmançı olub.
