Sumqayıtlı cüdoçular U-16 yeniyetmələr arasında "İstedadların seçimi" yarışının 2-ci turunda medallar qazanıblar.
Sumqayit24.az xəbər verir ki, Abşeron Olimpiya İdman Kompleksində keçirilən turnirin son günündə 118 cüdoçu mübarizəyə qoşulub. Belə ki, qız idmançılarımızdan Aişə Jestekina (+70 kq, Sumqayıt şəhəri 1 nömrəli İOEUGİŞM) çempion olub.
Bundan əlavə, oğlanlar arasında Nihad Məlikli (+90 kq, Neftçi Sumqayıt) gümüş, Abdulla Salam (66 kq, Sumqayıt şəhəri 1 nömrəli İOEUGİŞM) isə bürünc medala layiq görülüblər.
Qeyd edək ki, "İstedadların seçimi" yarışının keçirilməsində məqsəd milli komandanın sağlam alt bazasının formalaşdırılması, yığmaya namizəd perspektivli idmançıların aşkar edilməsi və dayanıqlı ehtiyat bazanın formalaşdırılmasıdır. İki turun yekun reytinq sıralamasında hər çəki dərəcəsi üzrə ilk 4 pillədə qərarlaşan idmançılar "Gələcəyin ümidləri" təlim proqramına cəlb olunacaq.
