Azərbaycan millisinin və "Neftçi"nin sumqayıtlı sabiq futbolçusu Kamal Quliyev hazırda davam edən müalicə prosesi, ona göstərilən dəstək və futbol ictimaiyyətindən gözləntiləri ilə bağlı açıqlama verib.
İdmançı Apasport.az-a hazırda müalicəsinin davam etdiyini, birinci mərhələni tamamladıqlarını, indi isə ikinci kurs müalicə üçün hazırlaşdığını bildirib.
Sabiq futbolçu indiyədək ona dəstək olan şəxslərə minnətdarlığını ifadə edib:
"Neftçi" rəhbərliyinə təşəkkürümü bildirirəm. İlk müalicəyə çox böyük dəstək verdilər. Daha sonra Qurban Qurbanova təşəkkür edirəm. Allah onun balalarını xoşbəxt etsin. "Sumqayıt" komandasına, klubun prezidenti Riad Rəfiyevə, o vaxt mənlə futbol oynayan uşaqlara minnətdaram. Onlar imkanı çatan qədər mənə dəstək olublar. Hamısının adlarını saymasam da, özləri bilirlər. Onlara təşəkkür edirəm. Adlarını çəkdiyim adamlar mən müraciət etmədən mənə dəstək olublar".
Maddi məsələlərə də toxunan sabiq milli üzvü bildirib ki, müalicə ciddi xərc tələb edir:
"Müalicədən sonra məbləğ açıqlanacaq. Bu müalicələrin hamısı yüksək vəsait, xərc tələb edir. Hər şey qan qiymətinədir".
O, AFFA ilə də əlaqə saxladığını qeyd edib:
"Federasiya ilə danışmışdıq, o vaxt xəstəxanada müalicə alırdım. Görüşmək mümkün olmadı. AFFA-ya çağırmışdılar, danışdıq ki, bayramdan sonra görüşək. İnşallah, sabah və ya birigün görüşə gedəcəm".
Kamal Quliyev çıxış etdiyi klublardan "Karvan"ın ona dəstək olmadığını söyləyib:
"Oynadığım və şərəfini qoruduğum klublardan yalnız "Karvan" qalıb. Sağ olsun, Kənan Kərimov öz şəxsi vəsaiti ilə mənə dayaq olub, kömək göstərib. İnşallah, Kənan müəllimlə danışmışam, klub rəhbərləri ilə də görüş olacaq. Çünki rəhbərlik hazırda orada deyil. Ümid edirəm ki, onlar da öz dəstəklərini göstərəcəklər. Mən "Karvan" klubunun yaradıcılarından biri olmuşam. Klub rəhbərliyi ilə aramızda hər zaman çox xoş münasibətlər olub. Həmin insanlar daim ehtiyacı olanlara əl tutublar, xeyirxah insanlardır. Vallah açığı, digər klublara müraciət etməmişəm. İnanın, nəsə istəyəndə xəcalət çəkirəm. Utanıram".
Sonda sabiq futbolçu komanda yoldaşları üçün darıxdığını və onlarla görüşmək istədiyini vurğulayıb:
"Rəşad Sadıqovu görmək istəyirəm. Onun o qədər gözəl söhbətləri var ki, insan qulaq asdıqca doymur. Həm də çoxdandır görmürəm. Zaur Tağızadəni də görmək istərdim, Elçin Rəhmanovu da. Çox darıxıram, çox sıxılıram. Digər komanda yoldaşlarımla danışırıq - Vüqarla, İlhamla, Zaurla, Ariflə, Ramizlə, Kənanla, Vitaliklə və digərləri ilə əlaqədəyik. Amma bəzilərini çoxdandır görmürəm".
Qeyd edək ki, Kamal Quliyev qara ciyər sirrozundan əziyyət çəkir.
