Sumqayıt güləş məktəbinin yetirməsi Azərbaycan Prezidenti İlham Əliyevin qəbulunda olub.
Sumqayit24.az xəbər verir ki, ölkə başçısı Albaniyanın paytaxtı Tiranada keçirilmiş Avropa çempionatında komanda hesabında Avropa çempionu olan yunan-Roma güləşi və sərbəst güləş, həmçinin qadın güləşi üzrə medal qazanmış idmançıları və onların məşqçilərini qəbul edib.
Onların arasında 87 kilqoram çəki dərəcəsində bürünc medal qazanan yunan-Roma güləşçisi İslam Abbasov da yer alıb.
Qeyd edək ki, İslam Abbasov 24 mart 1996-cı ildə Sumqayıt şəhərində anadan olub. O, idman karyerasına 2005-ci ildə başlayıb və qısa müddətdə həm ölkə daxilində, həm də beynəlxalq arenada böyük uğurlar qazanıb.
Abbasovun karyerasında ən parlaq dövrlərdən biri 2018-ci ilə təsadüf edir. O, həmin il 23 yaşadək (U-23) idmançılar arasında Avropa çempionu tituluna sahib çıxıb. Böyüklər arasında keçirilən yarışlarda da mütəmadi olaraq fəxri kürsüyə qalxan güləşçimiz, 2019-cu ildə Avropa Çempionatının və II Avropa Oyunlarının gümüş mükafatçısı olub. O, həmçinin 2020 və 2022-ci illərdə Avropa çempionatlarında bürünc medalları ölkəmizə qazandırıb.
87 kq çəki dərəcəsində mübarizə aparan İslam Abbasov, 2020-ci il Tokio Yay Olimpiya Oyunlarında Azərbaycanı təmsil edən idmançılardan biri olub. Hazırda o, milli komandanın aparıcı üzvlərindən biri kimi fəaliyyətini davam etdirir.
