"Sumqayıt" futbol klubunun yeni baş məşqçisinin adı yaxın günlərdə açıqlanmalıdır.
Məlumata görə, rəhbərlik uzun müddətdir danışıqlar apardığı əcnəbi mütəxəssisdən cavab gözləyir. Həmin çalışdırıcı portuqaliyalıdır. Prezident Riad Rəfiyev onunla görüşmək və müqavilə şərtlərini üzbəüz danışmaq üçün həmin ölkəyə yollanıb.
Müəyyən razılaşma əldə edilib, sadəcə, məşqçinin Türkiyəyə yollanmaq variantı da var. Belə ki, ona Super Liqadan təklif gəlib.
Portuqaliyalı mütəxəssis paralel olaraq onlarla görüşmələr keçirdiyindən, hələ seçimini müəyyənləşdirməyib. Türkiyə klubu ilə danışıqlar uzandığı üçün, "kimyaçılar"ın gözü yolda qalıb.
Bu sövdələşmənin gerçəkləşməsi də mümkündür, əksi də. Hər halda sumqayıtlılar ümidini üzməyib, səbrlə prosesin gedişatını izləməkdədirlər.
Xatırladaq ki, "Gənclik şəhəri" təmsilçisini bu mövsüm Saşa İliç çalışdırıb. Serbiyalı komandanı avrokuboklara daşıya bilmədiyi üçün müqaviləsinin müddəti uzadılmayıb.
