"Azərbaycanda, xüsusilə şəhərlərdə havanın çirklənməsində birinci yerdə avtomobil nəqliyyatı dayanır. Nəqliyyatın intensiv hərəkəti, yanacaq istehlakının artması, benzin və dizel yanacağındakı kimyəvi maddələr havanın çirklənməsinin əsas səbəblərindəndir. Bakı, Sumqayıt, Gəncə və digər böyük şəhərlərdə bu problem daha qabarıq hiss olunur".
Bunu Demokrat.az-a açıqlamasında ekoloq Sadiq Həsənov deyib. O, bildirib ki, xüsusilə payız və qış aylarında çirklənmə daha intensiv olur:
"Yol sıxlığı və tıxaclar zamanı avtomobillər saatlarla eyni yerdə dayanır, yanacaq isə tam yanmadığı üçün ətraf mühitə karbohidrogen, karbonmonoksit (CO), karbon dioksid (CO₂), azot oksidləri və digər zəhərli qazlar buraxılır. Normal halda dizel yanacağı yalnız 30–35 faiz yanır, qalan hissəciklər isə havaya qarışır və çirkliliyi artırır".
Ekoloq bildirib ki, energetika və neft-kimya sektoru da bu çirklənməyə təsir göstərir:
"Qışda havanın nəmliyi, yağış və qar müəyyən qədər havanı təmizləyir, çirklənmiş hissəcikləri aşağıya çöktürür. Lakin bu proses davamlı olmadığından, qış aylarında da çirklənmə davam edir. Yayda isə günəşin təsiri ilə karbonmonoksit və azot oksid kimi tullantılar daha sürətlə parçalanır və zəhərli qazlara çevrilərək ətrafa yayılır".
Onun sözlərinə görə, ümumiyyətlə, şəhərlərin havası ifrat dərəcədə çirklidir:
"Karbonmonoksit, azot oksidlər və 2–10 mikron ölçülü zərərli hissəciklərin həcmi artır və bu hissəciklər uzun müddət atmosferdə qala bilir, insan sağlamlığı üçün ciddi risk yaradır".
