Sumqayıtda küçələrdən birində su israfı və antisanitar vəziyyətlə bağlı şikayət var.
Sumqayit24.az-a bu barədə 21-ci mikrorayon, İsmət Qayıbov küçəsinin sakinləri məlumat veriblər.
Sakinlərin iddiasına görə, təxminən bir aydır ki, küçədəki su borusunda nasazlıq yaranıb və su boş yerə axaraq israf olunur. Bildirilib ki, məsələ ilə bağlı aidiyyəti quruma müraciət edilsə də, problem aradan qaldırılmayıb.
Bundan əlavə, ərazidə antisanitar vəziyyətin yarandığı bildirilir. Sakinlərin sözlərinə görə, yaxınlıqda zibil qutusu yoxdur. İddia olunub ki, bəzi sakinlər zibil pulunu ödəmədikləri üçün tullantıları müxtəlif yerlərə atırlar.
Vətəndaşlardan biri qeyd edib ki, zibil maşınının əməkdaşları ödəniş edilmədiyi üçün tullantıları ərazidən götürmədiklərini bildirirlər:
"Deyirlər ki, zibili qapıdan yığırıq, sakinlər ödənişlərini etsinlər, biz də yığaq".
Məsələ ilə bağlı Sumqayıt Təmizlik Departamentindən redaksiyamıza bildirilib ki, 21-ci mikrorayon ərazisində departamentin maşını siqnal sistemi vasitəsilə hər gün ərazidəki tullantıları yığır. Həmçinin qeyd olunub ki, topa şəklində toplanan tullantılar da mütəmadi olaraq təmizlənir.
Su israfı şikayəti ilə bağlı isə İri Şəhərlərin Birləşmiş Su Təchizatı Xidmətinə sorğu ünvanlanıb.
