"Stansiya Sumqayıt" kimi tanınan əraziyə gedən yoldakı problemlərlə bağlı şikayət var.
Sumqayit24.az-a bu barədə sakinlər məlumat veriblər.
Vətəndaşların iddiasına görə, Şəfəq qəsəbəsinə gedən yolda quraşdırılmış metal konstruksiyalı hasarın bir hissəsi naməlum şəxslər tərəfindən sındırılıb. Bundan əlavə, ərazidə əkilən ağacların bir neçəsinin kökündən çıxarılaraq oğurlandığı iddia edilir.
Sakinlərdən biri narazılığını belə ifadə edib:
"Bir ay deyil buraları düzəldiblər. Hasar sındırılıb, ağaclar oğurlanıb, indi yenisi ilə əvəz edirlər. Sağ olsunlar, bizim üçün düzəldiblər, heç olmasa, qoyun səliqəli qalsın da. Niyə qırıb oğurlayırsınız axı?".
Şikayətlər bununla bitmir. Qəsəbə sakinləri ərazidə yol və işıqlandırma ilə bağlı problemlərin də olduğunu bildirirlər.
"Qəsəbədaxili yolların və işıqların yenisi ilə əvəz olunması barədə tədbir görülsün.Yollar da bərbad vəziyyətdədir, çoxu çöküb. Ümumi magistral yolda da işıqlandırma yoxdur. İşıqlar çox zəifdir, çoxu da yanmır. Gecə maşın sürəndə göz-gözü görmür", - deyə vətəndaşlar narazılıqlarını ifadə ediblər.
Şikayətçilər aidiyyəti qurumlardan sadalanan problemlərin araşdırılmasını və həlli istiqamətində tədbirlər görülməsini tələb edirlər.
