Sumqayıtın ən gediş-gəlişli küçələrindən birində piyadalar üçün ciddi problem var.
Sumqayit24.az-a daxil olan məlumata görə, Babək küçəsində piyada keçidləri mövcud olsa da, ərazidə təhlükəsiz və rahat hərəkət tam təmin edilməyib. Yol kənarındakı bordürlərdə pandusların olmaması yolu keçmək istəyən azyaşlı uşağı olan valideynlər, uşaq və əlil arabasından istifadə edən şəxslər, eləcə də yaşlı insanlar üçün sınağa çevrilib.
Bəzi hallarda isə piyadalar keçiddən istifadə edə bilmədikləri üçün xeyli məsafə qət etməyə məcbur qalırlar.
Problemlər bununla da bitmir. Küçənin qarşı tərəfində yerləşən marketlərin önündə avtomobillərin "zebra"nın üzərində park edilməsi piyadalar üçün əlavə narahatlıq yaradır.
Sakinlər aidiyyəti qurumlardan problemin aradan qaldırılmasını, pandusların quraşdırılmasını və piyada keçidinə nəzarətin gücləndirilməsini xahiş edirlər.
