İki gün əvvəl Sumqayıt şəhəri, Heydər Əliyev prospektinin 19-cu məhəllədən keçən hissəsində fəaliyyət göstərən çayxananın səkini zəbt etməsi ilə bağlı Sumqayit24.az tərəfindən sakinlərin şikayəti işıqlandırılıb. Mövzu ictimai rezonans doğurub, çoxsaylı oxucu bu problemin şəhərin müxtəlif ərazilərində də yaşandığını bildirib.
Lakin Sumqayit24.az-a müraciət edən sakinlərin sözlərinə görə, müraciətlərə və narazılıqlara baxmayaraq, vəziyyət dəyişməyib. Çayxananın masa və stulları hələ də səkidə qalır, piyadaların hərəkəti məhdudlaşır, bəzi hallarda insanlar avtomobil yoluna çıxmağa məcbur olurlar.
Bina sakinləri həmçinin səhərdən gecə saatlarınadək davam edən səs-küydən, domino oyunları və yüksək səslə aparılan söhbətlərdən narahat olduqlarını bildirirlər. Bu səbəbdən mənzillərin pəncərələrini aça, balkondan istifadə edə və evdə rahat dincələ bilmirlər.
Şikayətin işıqlandırılmasına, sakinlərin haqlı narazılığına baxmayaraq, məsul qurumlar məsələyə operativ müdaxilə etmək əvəzinə bu dəfə səssiz qalmağı üstün tutublar. Bu da haqlı olaraq, növbəti dəfə sakinlərin narazılığına səbəb olur. Sakinlər aidiyyəti qurumları məsələyə müdaxilə etməyə, piyadaların təhlükəsiz hərəkət hüququnun və sakinlərinin rahatlığının təmin olunmasına çağırırlar.
