Sumqayıtın Kotec qəsəbəsi ilə Yaşıl Dərə yaşayış massivi arasında fəaliyyət göstərən 10A nömrəli avtobus marşrutu ilə bağlı şikayətlər artıb.
Şikayətçilərin sözlərinə görə, marşrutun fəaliyyətində müşahidə olunan problemlər artıq təxminən yarım ildir davam edir. Avtobusların hərəkət intervalı normadan artıqdır və bu səbəbdən sərnişinlər dayanacaqlarda uzun müddət gözləmək məcburiyyətində qalırlar.
Onlar iddia edirlər ki, son günlər vəziyyət daha da pisləşib. 10A xəttində çalışan sürücülərin əhəmiyyətli hissəsi işini dayandırıb. Sakinlər bunu əməkhaqqı, ödəniş mexanizmi və reys qrafiki ilə bağlı yaranan narazılıqlarla əlaqələndirirlər:
"Əvvəl işləyən sürücülərin təxminən 80 faizi marşrutu tərk edib və onların yerinə yeni sürücülər cəlb olunub. Lakin yeni heyətin çalışdığı avtobuslar da bəzi hallarda 40 dəqiqəyədək intervalla hərəkət edir".
Məlumata görə, hazırda xəttə cəmi 6 avtobus buraxılır. Bu isə sərnişin axınının qarşılanmasında çətinlik yaradır və marşrutdan istifadə edənlərin narazılığını artırır.
Sakinlər aidiyyəti qurumların məsələyə müdaxilə etməsini, marşrutda fəaliyyət göstərən avtobusların faktiki sayının və hərəkət intervalının açıqlanmasını, həmçinin sürücülərin narazılıqlarının səbəblərinin araşdırılmasını xahiş edirlər.
Mənbə: Sumqayit.tv
