Sumqayıtın Tarixi Muzeyində “Gender bərabərliyi-insan hüquqları” adlı dəyirmi masa keçirilib. Bu haqda bu gün, 26 aprel tarixində Sumqayıt MKS-ə istinadən xəbər veririk.
Məlumata əsasən, tədbirdə 5 nömrəli tam orta məktəbin müəllim və şagird kollektivi, Sumqayıt şəhər MKS-in direktor müavini Natəvan Axundzadə, Qadın Resurs Mərkəzinin koordinatoru, Beynəlxalq Miqrasiya Təşkilatının təlimçisi Günel Ələkbərova, Qadın Təşəbbüsü və Sosial Problemlərin Həllinə Yardım İctimai Birliyinin sədri Zemfira Mustafayeva iştirak ediblər. Onlar gender bərabərliyinin təmini, qadın və kişilər üçün bərabər imkanların yaradılması, qadınlara və uşaqlara qarşı zorakılığın qarşısının alınması, pozulmuş hüquqların aradan qaldırılması haqda müzakirələr aparıblar.
