Sumqayıt Dövlət Universiteti (SDU) "UI GreenMetric World University Rankings 2026" Beynəlxalq Reytinqində 204 pillə irəliləyib.
Sumqayit24.az xəbər verir ki, Sumqayıt Dövlət Universiteti (SDU) dayanıqlı inkişaf və yaşıl kampus istiqamətində həyata keçirdiyi ardıcıl fəaliyyətlərin nəticəsi olaraq "UI GreenMetric World University Rankings 2026" beynəlxalq reytinqində əhəmiyyətli irəliləyişə nail olub.
Universitet 1129-cu pillədən 925-ci pilləyə qalxıb. Beləliklə, 110 ölkədən 2016 universitetin iştirak etdiyi reytinqdə SDU bir il ərzində 204 pillə yüksəlib.
Eyni zamanda, SDU-nun ümumi balı da əhəmiyyətli dərəcədə artıb. Universitet builki qiymətləndirmədə 5838 bal toplayıb. Bu, ötənilki 4712 balla müqayisədə 24 faiz artım deməkdir.
Metodologiyaya əsasən universitetlər infrastruktur, enerji və iqlim dəyişikliyi, tullantıların idarə edilməsi, su, nəqliyyat, təhsil və tədqiqat, idarəetmə və rəqəmsallaşma olmaqla 7 kateqoriya və 60 indikator üzrə qiymətləndirilir.
