Sumqayıt sakini Siyəzən rayonunda baş vermiş ağır qəza zamanı dünyasını dəyişib. Sumqayıt24 bu haqda 15 iyun tarixində Bizim.media-ya istinadən xəbər verir.
Hadisə Bakı-Quba magistralının təmir gedən hissəsində qeydə alınıb. Sumqayıt sakini, 34 yaşlı Xalidə Xəlilzadənin idarə etdiyi "Nissan" markalı avtomobil Quba istiqamətinə gedərkən əks istiqamətdən gələn Siyəzən sakini, 31 yaşlı Azər Ağayevin sükan arxasında olduğu "Mercedes" markalı avtomobil ilə toqquşub.
Nəticədə Xalidə Xəlilzadə hadisə yerində, sərnişini, 19 yaşlı Quba sakini Gülbəniz Qaçıyeva isə rayon Müalicə-Diaqnostika Mərkəzində vəfat ediblər.
Müxtəlif xəsarətlər almış "Mercedes"-in sərnişinləri və sürücüsü Azər Ağayevə həmin mərkəzdə tibbi yardım göstərilib. Sərnişinlər arasında 8 yaşlı qız da olub.
Faktla bağlı cinayət işi açılıb. Hadisədə kimin günahkar olduğunu avtotexniki ekspertizanın rəyi müəyyən edəcək.
