Sumqayıtda küçə işıqlandırılması ilə bağlı şikayətlər davam edir.
Sumqayit24.az-a bu barədə 10-cu mikrorayon, Üzeyir Hacıbəyli küçəsinin sakinləri məlumat veriblər.
Vətəndaşların sözlərinə görə, ərazidə işıq dirəkləri olsa da, küçə işıqlandırılması təmin edilmir. Bildirilib ki, ərazi həm nəqliyyat vasitələri, həm də piyadalar tərəfindən intensiv istifadə olunur.
"Uzun müddətdir ərazi gecələr zülmət qaranlığa qərq olur. Yaxınlıqda kiçik park da var. Bir sözlə, ərazi intensiv istifadə olunsa da, işıqlandırma yoxdur", - deyə sakinlər bildiriblər.
Onlar aidiyyəti qurumlardan ərazidə küçə işıqlandırmasının təmin olunmasını xahiş edirlər.
Qeyd edək ki, redaksiyamız müxtəlif vaxtlarda şəhərin müxtəlif ərazilərində küçə işıqlandırılması ilə bağlı şikayətlər işıqlandırıb.
