Sumqayıtda yolda yaranan çökmə sakinlərin ciddi narahatlığına səbəb olub.
Bu barədə Sumqayit24.az-a şəhər sakinləri məlumat veriblər.
Bildirilib ki, 26-cı məhəllədə, Xəzər bağları yaşayış massivinin Qubad Əliyev küçəsində kanalizasiya lükünün yaxınlığında asfalt örtüyü dağılıb. Sakinlər yolun çökməsindən və bunun yarada biləcəyi təhlükədən olduqca narahatdırlar.
Onlar ötən ilin iyun ayında Bakının Nərimanov rayonunda yer səthinin çökməsi nəticəsində Cümşüd Cümşüdlünün kanalizasiya sularının axdığı kanala düşməsi hadisəsini xatırladaraq, oxşar vəziyyətin Sumqayıtda da baş verə biləcəyindən ehtiyat edirlər.
Bundan əlavə, sakinlər videoda yolun digər hissələrində də nahamarlıq və kələ-kötürlük olduğunu bildiriblər. Qeyd olunub ki, yolun bu vəziyyətdə olması nəqliyyat vasitələrinin hərəkətinə çətinlik yaradır və avtomobillərə ziyan vura bilər.
Şikayətçilər aidiyyəti qurumlardan əraziyə baxış keçirilməsini və mövcud problemlərin aradan qaldırılmasını tələb edirlər.
