Sumqayıtda fəaliyyət göstərən 8 nömrəli avtobus marşrutu qrafikə uyğun hərəkət etmir.
Bu barədə Sumqayit24.az-a sakinlər məlumat veriblər. Onların sözlərinə görə, avtobuslar hərəkət cədvəlinə əməl etmir. Bildirilir ki, avtobusların iş saatı 20:00-a qədər olsa da, bəzi günlər onlar saat 19:00 radələrində xəttdən çıxır. Nəticədə sərnişinlər dayanacaqlarda uzun müddət gözləməli olur və mənzil başına çatmaqda çətinlik yaşayırlar.
Axşam saatlarında avtobusların sayının azalması xüsusilə işdən qayıdan vətəndaşlar üçün ciddi problem yaradır.
Bundan başqa, bəzi sürücülərin marşrut üzrə bütün dayanacaqlara daxil olmadığı da iddia edilir. Bu səbəbdən sərnişinlər təyinat nöqtələrinə çatmaq üçün əlavə olaraq digər avtobuslardan istifadə etməyə məcbur qalırlar ki, bu da həm vaxt itkisinə, həm də əlavə xərcə səbəb olur.
Sakinlər aidiyyəti qurumlardan 8 nömrəli avtobus marşrutunun hərəkət qrafikinə nəzarətin gücləndirilməsini, avtobusların müəyyən edilmiş iş saatının sonunadək fəaliyyət göstərməsini və marşrut üzrə bütün dayanacaqlara xidmət göstərməsini təmin etməyi xahiş edirlər.
