Bu ilin iyul ayında Abşeron yarımadasında ən yüksək hava temperaturu məhz Sumqayıtda qeydə alınıb.
Sumqayit24.az Milli Hidrometeorologiya Xidmətinə istinadən xəbər verir ki, iyulun 26-da şəhərimizdə termometrlər 40 dərəcə isti göstərib.
Bundan başqa, iyulun 3 və 9-da Sumqayıtda minimal temperatur 20 dərəcə isti qeydə alınıb və bu göstərici yarımada üzrə ayın ən aşağı temperatur olub.
Ümumilikdə, iyul ayında Bakı və Abşeron yarımadasında hava əsasən normadan isti keçib. Ayın 27 günü havanın temperaturu iqlim normasından 0–6 dərəcə yüksək, cəmi 2 günü normadan aşağı, 2 günü isə norma daxilində müşahidə olunub. Orta aylıq temperatur 28 dərəcə isti olmaqla iqlim normasını 1 dərəcə üstələyib.
Ay ərzində yarımadada 9 gün küləkli hava şəraiti müşahidə olunub, iyulun 27-də küləyin maksimal sürəti 28 m/s-ə çatıb.
