Əfsanəvi aktyor Ceki Çan Azərbaycandadır və Bakıda "Tanrının zirehi 4: Ultimatum" beynəlxalq macəra filminin bəzi səhnələrinin çəkilişləri başlayır.
Sumqayit24.az Qazaxıstanın paytaxtımızdakı səfirliyinə istinadən xəbər verir ki, aktyor Azərbaycanda təxminən on gün keçirəcək.
Filmin əsas çəkiliş meydançası Qazaxıstandır. Manqistau və Almatı vilayətlərində, eləcə də Almatıda çəkilişlər baş tutub. Qazaxıstan tərəfinin təklifi ilə çəkilişlər üçün ikinci ölkə olaraq Azərbaycan seçilib. Filmin istehsalı ilə Qazaxıstanın "Salem Entertainment" kinokompaniyası məşğul olur. Layihənin prodüseri şirkətin qurucusu Rüstəm Omarov, rejissoru isə namizədliyini şəxsən Ceki Çanın təsdiqlədiyi qazaxıstanlı quruluşçu və kaskadyor Robert Kundur. Bakıdakı çəkilişlərə Qazaxıstanın Azərbaycandakı səfirliyi dəstək göstərir.
Çəkilişlər üçün şəhərin ən çox tanınan görməli yerlərindən bəziləri seçilib. Kadrlarda İçərişəhər, Dağüstü park, Bakı funikulyoru, Yaşıl teatr və Fəvvarələr meydanı görünəcək.
Filmin premyerası 2027-ci ilə planlaşdırılıb.
Məlumat üçün bildirək ki, ötən gündən sosial şəbəkələrdə aktyorla Bakıda çəkilmiş kimi təqdim olunan çoxsaylı fotolar yayılıb. Lakin dünən paytaxtda olan şəxs Ceki Çanın özü deyil, onun dublyorudur. Dublyor Bakıda çəkilişlərin aparılacağı məkanlarda olub. Eyni zamanda bəzi fotoların süni intellektlə hazırlanması da istisna edilmir.
