Fövqəladə Hallar Nazirliyi (FHN) ölkə ərazisində gözlənilən hava şəraiti ilə əlaqədar əhaliyə müraciət edib.
Sumqayit24.az xəbər verir ki, FHN əhalini müvafiq təhlükəsizlik qaydalarına riayət etməyə çağırıb.
Bildirilib ki, Milli Hidrometeorologiya Xidmətinin məlumatına görə, yaxın günlər ərzində ölkə ərazisində hava şəraitinin fasilələrlə yağıntılı keçəcəyi, yağışın ayrı-ayrı yerlərdə leysan xarakterli və güclü olacağı, dağ çaylarında sel və daşqınlar baş verəcəyi, şimşək çaxacağı, bəzi ərazilərdə isə güclü külək əsəcəyi proqnozlaşdırılır.
"Məlum hava şəraiti ilə əlaqədar, intensiv yağıntıların səbəb ola biləcəyi sel və daşqınlardan qorunmaq üçün belə ərazilərdən uzaq durmaq, təhlükə ilə üzləşdikdə dərhal yaxınlıqdakı yüksəkliyə qalxmaq tövsiyə olunur", – müraciətdə qeyd olunub.
Həmçinin, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəkləri və naqillərinin, hündür ağacların altında dayanmamaq tövsiyə olunur.
"Güclü küləyin yanğınların söndürülməsi ilə bağlı yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir. Bundan əlavə, kiçikhəcmli gəmi istifadəçiləri belə hava şəraitində dənizə çıxmağın qadağan olunduğunu nəzərə almalıdırlar".
Nazirlikdən bildirilib ki, ildırımla bağlı təhlükələrdən qorunmaq üçün elektrik cihazlarını şəbəkədən ayırmaq, telefonla (sabit şəbəkə, mobil, taksofon və s.) danışmamaq, açıq havada olarkən elektrik xətlərinə, ildırımötürücülərə, navalça və antenalara yaxınlaşmamaq, hündür ağacların altında sığınmamaq, bu məqsədlə nisbətən çökək yer seçmək, avtomobildə olduqda isə hərəkəti dayandıraraq şüşələri qaldırmaq və ildırımın bitməsini gözləmək lazımdır.
