Sumqayıtın Qara Brilliantı
5 dəfə dünya, 11 qat Avropa çempionu Rafael Ağayev Sumqayıtda anadan olub. Uşaq yaşlarından idmana böyük maraq göstərib və atasının təşəbbüsü ilə karate ilə məşğul olmağa başlayıb. Bu seçimin səbəbi isə Rafaelin uşaq yaşlarında dava-dalaşa meylli, dəcəl olmasıdır. Orta məktəbdə çox dəcəl olan və dərslərin oxumayan Rafaelin qiymət cədvəlində cəmi iki 5 olub: Bədən tərbiyəsi və əmək təlimi dərslərindən.
Onun ilk müəllimi karate ustası Rafael Məmmədov olub. Texniki bacarıqları və döyüş üslubu ilə seçilən Ağayev qısa müddətə yarışlara cəlb edilir. Onu Karatenin Messisi adlandırırlar. Beşqat dünya və onbirqat Avropa çempionluğu ilə yanaşı müxtəlif beynəlxalq turnirlərdə də qalib gəlib. 2020-ci ildə Tokiyo Yay Olimpiya oyunlarının gümüş medalçısıdır.
Rafael həm də Qara Brilliant ləqəbi ilə tanınır. Bu ad ona 19 yaşında ilk dəfə dünya çempionu olanda Avropa və Ümumdünya Karate Federasiyasının prezidenti Antonio Espinoza tərəfindən verilib. Ən yaxın dostları da idmançı olan Ağayev səbrsizliyi ilə tanınır. Qara Brilliant övladının da idmançı olmasını istəyir.
