Sumqayıtda hasarın aşması nəticəsində ölən şəxsə dair bəzi məlumatlar bəlli olub.
“Xəzər Xəbər"-in məlumatına görə, həlak olan 45 yaşlı Natiq Haqverdiyev ailəli olub və 4 övladı var. O, Xızı rayonunda kirayədə yaşayıb və dolanışığını kərpic qırıntısı daşıyıb satmaqla təmin edirdi.
Hadisə ilə bağlı hüquq-mühafizə orqanları tərəfindən araşdırmalara başlanılıb. Əraziyə mütəxəssislər cəlb olunublar, ekspertiza təyin edilib. Faktla bağlı Sumqayıt Şəhər Prokurorluğunda araşdırma davam etdirilir.
Xatırladaq ki, N.Haqverdiyev ona məxsus 90-SL-568 dövlət nömrə nişanlı “KamAZ” markalı yük maşınını hündür hasarın kənarında saxlayan zaman güclü külək hasarı avtomobilin üzərinə aşırıb. Sürücü aldığı xəsarətlərdən yerindəcə keçinib.
