Hər gün minlərlə insanın istifadə etdiyi Bakı-Sumqayıt qatarlarında mobil şəbəkə problemi hələ də aradan qaldırılmayıb.
Sumqayit24.az-a müraciət edən sərnişinlər bildirirlər ki, vaqonların daxilində nə normal zəng etmək, nə də mobil internetdən istifadə etmək mümkündür. Xüsusilə hərəkət zamanı şəbəkə tamamilə yox olur, telefonlar ya "şəbəkə yoxdur" xəbərdarlığı verir, ya da internet son dərəcə zəif işləyir. Bu vəziyyət isə gündəlik olaraq qatardan istifadə edən vətəndaşların narazılığına səbəb olur.
Sərnişinlərin sözlərinə görə, Bakı–Sumqayıt qatarlarından əsasən tələbələr və iş adamları istifadə edir. Onların əksəriyyəti yolboyu onlayn dərslərə qoşulur, iş yazışmaları aparır, sənədlər göndərir və ya sadəcə internetə ehtiyac duyur:
"Bu qədər müasir qatarlar istifadəyə verilib, amma elementar mobil rabitə problemi hələ də həll olunmayıb. Ya qatarlarda güclü, stabil internet təmin olunsun, ya da ən azından şəbəkə gücləndiriciləri quraşdırılsın ki, şəxsi mobil internetimiz işləsin".
Vətəndaşlar problemin tez bir zamanda həll olunmasını tələb edirlər.
