Sumqayıt şəhəri 10-cu mikrorayon, 24 nömrəli məktəbin yaxınlığında ərazi məişət tullantılarından təmizlənib.
Sumqayit24.az-a daxil olan məlumata görə, qeyd olunan ünvanda antisanitar vəziyyət polisin müşayəti ilə aidiyyəti dövlət qurumları tərəfindən aradan qaldırılıb.
***
Sumqayıtın 10-cu mikrorayonunda antisanitar vəziyyətlə bağlı şikayət var.
Bu barədə Sumqayit24.az-a yerli sakinlər məlumat veriblər.
Vətəndaşların sözlərinə görə, 24 nömrəli məktəbin yaxınlığında zibil qutularının sayının az olması səbəbindən məişət tullantıları konteynerlərə sığmır, ətrafa və yola tökülür.
Sakinlər bildirirlər ki, zibil qutularına atılan tullantıların əksəriyyətini köhnə mebel, məişət avadanlıqları və digər ev əşyaları təşkil edir. Bundan əlavə, qeyd olunub ki, hər gecə, xüsusilə səhər saat 4-5 radələrində zibillər yandırılır.
"Zibillərin yandırılması nəticəsində yaranan tüstü və kəskin pis qoxu evlərimizə dolur, rahatlığımızı pozur və sağlamlığımız üçün narahatlıq yaradır. Sakinlər bu vəziyyətə nə qədər dözməlidir? Nə üçün zibil qutularının sayı artırılmır, əraziyə əlavə konteynerlər qoyulmur? Tullantıların yandırılmasının qarşısını almaq üçün niyə tədbir görülmür?" - deyə sakinlər narazılıqlarını bildiriblər.
Onlar müvafiq qurumlardan mövcud problemlərin həll edilməsini tələb edirlər.
