Sizə haradan xəbər verim, nəydən danışım, Sumqayıtın mərkəzindən. Bir ilə yaxındır ki, şəhərin mərkəzindəki Nizami meydanında qanunsuz quraşdırılan ticarət piştaxtaları yerli sakinləri zara gətirmişdi. Parkın düz ortasında quraşdırılan, 1990-cı illərin "talkuçkası"nı xatırladan bu ticarət köşkləri ilə bağlı şikayət axır ki, bizim redaksiyaya da gəlib çıxdı.
Jurnalistlər tərəfindən məsələ işıqlandırıldı, sosial şəbəkələrdə geniş rezonans doğurdu. Birdən nə olsa yaxşıdı? Sumqayıt Şəhər İcra Hakimiyyətinin məsul qurumu dərhal, operativ şəkildə, ildırım sürətilə hərəkətə keçdi. Qısa müddət ərzində "palatkalar" söküldü, meydanın korlanan mənzərəsi özünə qaytarıldı, ərazidən keçənlərin canı rahatlığa çıxdı. Hələ bir də ildırım sürətli əməliyyatın ardınca da açıqlama verilib ki, bəs nə imiş, quraşdırılan ticarət köşkləri qeyri-qanuni imiş.
Vallah, billah bu açıqlamanı oxuyanda əlim üzümdə qaldı, başımdakı 4-5 tük biz-biz oldu. A kişi, adamlar işləyir dəə. Adamlar operativ rekasiya verir, hələ üstəlik açıqlama da verirlər. İlk baxışdan belə görünür deyilmi? Amma di gəl ki, medalyonun başqa üzü də var. Çünki bu açıqlama və ABŞ xüsusi təyinatlılarını sürətinə görə kölgədə qoyan bu "əməliyyat" bir sıra suallar ortaya çıxarır. Birincisi, balam, Nizami parkı bəyəm Sumqayıtın gediş-gəliş olmayan, gözdən-könüldən iraq ərazisidir ki, bir ilə yaxındır heç bir rəsmi qurumun əməkdaşı məsələdən xəbərdar deyil? Yaxşı, Sumqayıt boyda şəhərdə o qədər rəsmi qurum var, onların heç birinin əməkdaşı ayanda-sayanda bir dəfə də olsun yolunu bu günə qədər Nizami parkına salıb, oradakı mənzərədən hali deyildi?
Lap bunları da qoydum kənara, axı bu narazılıq ilk olaraq sosial şəbəkələrdə yayılıb, bu qurumların, İcra hakimiyyətinin sosial şəbəkələri monitorinq edən mətbuat xidməti yoxdur? Bildiyim qədəri ilə, mətbuatla əlaqəli bir şöbə olmalıdır. Yaxşı, varsa, niyə monitorinq edib şikayətləri, narazılıqları vaxtında görüb reaksiya vermirlər? İşlərinin, güclərinin adı nədir? Hörmətli İcra başçısının iştirak etdiyi tədbirlərdə çəkilən şəkilləri paylaşmaq? Yoxsa belə fotoları internet resursunda görəndə like atəşinə tutmaq?
Əzizlərim, Sumqayıt ölkənin ikinci böyük şəhəridir və turizm potensialı var. Belə bir şəhərə biganə yanaşmaq heç vicdandandır? Nə vaxta qədər problemlər, şikayətlər bizim vasitəmizlə işıqlandırılacaq və siz reaksiya verəcəksiniz? Bəlkə bir dəfə də biz problemə və şikayətə anında reaksiya verən qurumdan yazaq? Bu arzumuzu ürəyimizdə qoymayın. Axı, 2026-cı ildir, yeni ilə yeni arzularla girmişik.
Qalib İmanoğlu
