Saray qəsəbəsində kanalizasiya xəttində baş verən qəza nəqliyyatın hərəkətini məhdudlaşdırıb.
Sumqayit24.az-a daxil olan məlumata görə, qəza "Saray-H" MTK yaşayış kompleksinin girişində, Heydər Əliyev küçəsində, intensiv nəqliyyat axınının olduğu və yaxın vaxtlarda əsaslı şəkildə asfaltlanaraq yenilənmiş yol hissəsində baş verib.
Qeyd olunub ki, kommunal qəzanın aradan qaldırılması məqsədilə yolun bir hissəsi qazılıb, asfalt örtüyü sökülərək təmir işləri aparılıb. Lakin işlər başa çatsa da, yol əvvəlki vəziyyətinə qaytarılmayıb. Sakinlərin sözlərinə görə, qazıntı zamanı çıxarılan torpaq və palçıq asfaltın üzərinə tökülüb, ərazidə təmizləmə və bərpa işləri isə ləng aparılır.
Bildirilib ki, bu cür vəziyyət həm piyadaların hərəkətini çətinləşdirir, həm də sürücülər üçün əlavə narahatlıq yaradır.
Sakinlər aidiyyəti qurumlardan problemin qısa müddətdə aradan qaldırılmasını xahiş edirlər.
