Bu gün səhər saatlarında Abşeron dairəvi dəmir yolu xəttində problem yaşanıb.
Sumqayit24.az-a daxil olan məlumata görə, saat 07:50-də Sumqayıt stansiyasından yola düşməli olan Sumqayıt–Pirşağı–Bakı qatarı hərəkətə başlamayıb.
Sərnişinlərin sözlərinə görə, ərazidə çalışan ADY əməkdaşları qatarda texniki nasazlıq olduğunu bildirərək növbəti, yəni saat 08:50 reysini gözləməyi məsləhət görüblər.
Nəticədə bir sıra sərnişinlər taksi ilə avtovağzala getməli olublar:
"Məcbur taksi ilə avtovağzala getdik. Əlavə xərcə düşdük. Üstəlik, işə, dərsə gecikdik. Səhər pik saatıdır, belə vəziyyətdə insanlar nə etməlidir?"
Şikayətçilər səhər saatlarında reyslər arasında bir saatlıq fasilənin olmasına da narazılıq edirlər:
"Adi reys çıxmadısa, növbətini gözləmək üçün bir saat vaxt itiririk. Saat 08:06-da ekspress qatar çıxır, amma o da hamıya sərf etmir. Cəmi bir neçə stansiyada dayanır. Səhər pik saatında reyslər arasında niyə bir saat fasilə olmalıdır?"
