Sumqayıt Dövlət Universitetinin rektoru 700 bal toplayan abituriyentlə görüşüb.
Sumqayit24.az xəbər verir ki, professor Nurəli Yusifbəyli ali təhsil müəssisələrinə qəbul imtahanlarında IV ixtisas qrupu üzrə maksimum nəticə - 700 bal toplayan Sumqayıt şəhəri Təbiət Elmləri Təmayüllü Gimnaziyanın məzunu Samir Tağızadə ilə görüş keçirib.
Rektor Nurəli Yusifbəyli abituriyenti göstərdiyi nəticə münasibətilə təbrik edərək bildirib ki, yüksək mənəvi dəyərlərə, innovativ düşüncəyə malik gənc nəslin formalaşdırılması süni intellekt və rəqəmsal transformasiya dövründə ölkənin elmi potensialının inkişafına mühüm töhfə verir.
Süni intellekt texnologiyalarının tibb sahəsində artan roluna toxunan rektor, bu texnologiyaların tətbiqinin müalicə proseslərinin fərdiləşdirilməsi və cərrahi müdaxilələrin effektivliyinin yüksəldilməsi istiqamətində mühüm imkanlar yaratdığını vurğulayıb.
Qeyd edilib ki, rəqəmsal transformasiya şəraitində süni intellekt alətlərindən səmərəli istifadə bacarığına yiyələnmək, eləcə də müasir elmi bilik və peşəkar kompetensiyaları inkişaf etdirmək gələcəyin rəqabətqabiliyyətli həkimlərinin hazırlanmasının əsas istiqamətlərindən biridir.
Sonda professor Nurəli Yusifbəyli Samir Tağızadəyə gələcək təhsil və peşə fəaliyyətində uğurlar arzulayıb, onun əldə etdiyi yüksək nəticədə əməyi olan müəllimlərə və valideynlərinə təşəkkürünü ifadə edib.
Görüş xatirə fotosunun çəkilməsi ilə başa çatıb.
