Sumqayıt Dövlət Universitetinin rektoru Nurəli Yusifbəyli qəbul imtahanlarında ölkə üzrə ən yüksək nəticə göstərən sumqayıtlı abituriyentlərlə görüşüb.
Sumqayit24.az xəbər verir ki, rektor gənclərin uğurlarını Azərbaycanın təhsil sisteminin inkişafının və onların zəhmətinin nəticəsi kimi qiymətləndirib. O bildirib ki, ali təhsilin əsas məqsədi yalnız diplom qazanmaq deyil, peşəkar, məsuliyyətli və milli-mənəvi dəyərlərə sadiq mütəxəssislər yetişdirməkdir. Nurəli Yusifbəyli müasir əmək bazarında uğur qazanmaq üçün nəzəri biliklərlə yanaşı, liderlik, təşəbbüskarlıq və komanda ilə işləmək bacarıqlarının da vacibliyini vurğulayıb.
Görüşdə yüksək nəticələrin əldə olunmasında əməyi olan müəllimlərə və valideynlərə də təşəkkür edilib.
Qeyd edək ki, bu il Sumqayıt şəhəri və Saray qəsəbəsindən olan abituriyentlər qəbul imtahanlarında ölkə üzrə ən yüksək nəticələrdən birini göstəriblər. Belə ki, Sumqayıt şəhər 35 nömrəli tam orta məktəbin məzunu Zamin Kərimov II ixtisas qrupu üzrə 690 bal toplayaraq ölkə birincisi olub.
III ixtisas qrupu üzrə isə Sumqayıt Təbiət Elmləri Təmayüllü Gimnaziyanın məzunu Əli Məmmədzadə və Saray qəsəbə 1 nömrəli tam orta məktəbin məzunu Orxan Mənsimli ikinci mərhələdə maksimum 400 bal toplayıblar. Əli Məmmədzadə ümumilikdə 689,6 bal toplayaraq bu qrup üzrə ölkə üzrə ən yüksək nəticəyə imza atıb. Orxan Mənsimli də yüksək nəticə göstərən abituriyentlər sırasında yer alıb.
