Yayın ən qızmar günləri yaşanır. Termometr 38-40 dərəcəni göstərir. Amma Sumqayıtda ictimai nəqliyyatdan istifadə edən sərnişinlər üçün vəziyyət daha da çətinləşib.
Xəbər verdiyimiz kimi, İcra Hakimiyyətinin nəzdində yaradılan operativ qrup marşrut avtobuslarında kondisionerlərlə bağlı gündəlik yoxlamalara başlayıb. Sürücülərə bildirilib ki, kondisionerlər fasiləsiz işlək vəziyyətdə olmalıdır, sərnişinlərin rahatlığı təmin edilməlidir.
Lakin Sumqayit24.az-a daxil olan çoxsaylı şikayətlər göstərir ki, reallıq bir qədər fərqlidir. Sakinlərin dediyinə görə, bəzi marşrutlarda kondisionerlər yalnız "şou üçün" – yəni yoxlama və ya çəkiliş zamanı işə salınır. Kamera gedən kimi isə kondisioner də söndürülür. Sərnişinlər isə havasız və isti avtobuslarda tərləyərək mənzil başına çatmağa çalışırlar.
Bu vəziyyət təkcə fiziki yox, psixoloji narahatlıq da yaradır. Uşaqlı analar, yaşlı insanlar, ürək-damar xəstəliyindən əziyyət çəkənlər üçün bu cür şərait həm təhlükəli, həm də qəbuledilməzdir.
