Kiçik və Orta Biznesin İnkişafı Agentliyi (KOBİA) tərəfindən həyata keçirilən "KOB könüllüləri" proqramına maraq artmaqda davam edir. Bu proqram Sumqayıt Dövlət Universitetinin (SDU) tələbə və məzunları üçün də praktiki təcrübə qazanmaq baxımından yaxşı imkan yaradır.
Sumqayit24.az xəbər verir ki, 2026-cı ilin yanvar-iyun aylarında proqrama qoşulmaq üçün KOBİA-ya 725 müraciət daxil olub. Agentliyin ehtiyacına uyğun olaraq artıq 66 gənc könüllü fəaliyyətə cəlb edilib. Onlar Agentliyin struktur bölmələrində və müxtəlif KOB evlərində sahibkarlara göstərilən xidmətlərdə, layihələrin və tədbirlərin təşkilində iştirak edirlər.
Qeyd edək ki, 2018-ci ildən həyata keçirilən proqram çərçivəsində indiyədək 909 nəfər könüllü olub. İştirakçılar arasında Sumqayıt Dövlət Universitetinin tələbə və məzunları da yer alır.
"KOB könüllüləri" proqramı hər biri 3 ay olmaqla iki mərhələdən ibarətdir. Könüllülər bu müddətdə real iş mühitində təcrübə qazanır, biznesə dəstək mexanizmləri ilə tanış olur və proqramı uğurla başa vurduqdan sonra sertifikat əldə edirlər.
Proqrama qoşulmaq istəyən tələbə və magistrlər elektron qaydada qeydiyyatdan keçə bilərlər.
