Sumqayıt şəhərində binanın qəzalı vəziyyətdə olduğu bildirilir.
Sumqayit24.az-a müraciət edən sakinlərin sözlərinə görə, 42-ci məhəllədə yerləşən 11 saylı yataqxananın daşıyıcı konstruksiya elementlərində ciddi korroziya müşahidə olunur. Belə ki, divarlardakı armatur paslanaraq yararsız vəziyyətə düşüb və əl dəyən kimi qopub tökülür.
Vətəndaşlar hesab edirlər ki, mövcud vəziyyət binanın təhlükəsizliyi baxımından narahatlıq doğurur və aidiyyəti qurumlar tərəfindən təxirəsalınmaz texniki baxış keçirilməlidir.
Sakinlər daha bir problemin də illərdir həllini tapmadığını bildirirlər. Onların iddiasına görə, 2004-cü ildə binada baş vermiş partlayışdan sonra yataqxanaya qaz verilişi dayandırılıb. Həmin vaxtdan etibarən sakinlər məcburiyyət qarşısında qalaraq məişətdə qaz balonlarından istifadə edirlər.
