Sumqayıt Şəhər İcra Hakimiyyətinin informasiya sistemləri və ehtiyatları "Hökumət buludu" (G-cloud) platformasına köçürülüb.
Sumqayit24.az xəbər verir ki, bu addım Azərbaycan Prezidenti İlham Əliyevin 2019-cu il 3 iyun tarixli, "Hökumət buludu"nun (G-cloud) yaradılması və "bulud" xidmətlərinin göstərilməsi sahəsində tədbirlər haqqında 718 nömrəli Fərmanının icrası çərçivəsində həyata keçirilib.
Layihə çərçivəsində Sumqayıtla yanaşı yanaşı, Salyan, Şəmkir, Ağsu və Hacıqabul Rayon İcra Hakimiyyətləri də öz informasiya sistemlərini "Hökumət buludu"na köçürüblər.
Qurumların İT resursları "AzInTelecom" MMC-yə məxsus Bakı Əsas Data Mərkəzində yerləşdirilib. Onlara Virtual server – IaaS (Infrastructure-as-a-Service) xidməti təqdim olunub ki, bu da kritik informasiya sistemlərinin yüksək əlçatanlığını təmin edir.
Bildirilib ki, "Hökumət buludu" layihəsi dövlət qurumlarının informasiya sistemlərinin müasir və təhlükəsiz data mərkəzlərinə köçürülməsini nəzərdə tutur. Bunun nəticəsində İT xərcləri azalır, sistemlərin məhsuldarlığı artır, həmçinin 24/7 monitorinq və dayanıqlı infrastruktur təmin edilir.
